Fferyllfeydd cymunedol

Dyn a ddau menyw yn aros o flaen cyflenwadau meddygol mewn fferyllfa

Cynllun anhwylderau cyffredin

Oeddech chi'n gwybod bod fferyllwyr bellach yn gwneud rhai o'r gwaith a wneir yn draddodiadol gan feddygon teulu? Mae hyn yn cynnwys cynnig meddyginiaeth presgripsiwn yn unig ar gyfer nifer o fân anhwylderau heb yr angen i weld meddyg yn gyntaf. Gallwch hefyd gael cyngor neu driniaethau dros y cownter ar gyfer nifer fawr o gyflyrau bob dydd - ac ni fydd yn rhaid i chi dalu amdanynt.

Fe'i gelwir yn Gynllun anhwylderau cyffredin. Rhaid i chi gofrestru gyda'r fferyllfa i ddefnyddio'r cynllun, ond dim ond ychydig funudau y mae'r broses yn ei gymryd.

Cynhelir ymgynghoriadau mewn ystafell breifat ac os bydd y fferyllydd yn penderfynu bod angen i chi weld meddyg o hyd, byddant yn eich atgyfeirio.

I gael rhagor o wybodaeth am y Cynllun Anhwylderau Cyffredin, dilynwch y ddolen hon. Sylwch fod y ddolen hon yn Saesneg.

Afiechydon cyffredin sy'n dod o dan y cynllun:

Acne

Brech cewynnau

Brech yr ieir

Cefn tost (acíwt)

Clefyd crafu

Colig

Diffyg traul

Dolur annwyd

Dolur gwddf

Ewinedd traed sy’n tyfu ar i mewn

Ferwca

Haemoroidau

Haint y llwybr wrinol (UTI)

Intertrigo

Llau pen

Llid ar y croen (croen sych)

Llid yr amrannau (bacterol)

Llindag y geg

Llindag y wain (thrwsh)

Llygaid sych

Llyngyr edau

Rhinitis alergaidd

Rhwymedd

Tarwden (ringworm)

Tarwden y traed (Athlete’s Foot)

Trafferthion tyfu dannedd

Wlser yn y geg

Y dolur rhydd

Cynllun Gwddf Dolurus

Mae pob fferyllfa gymunedol ar draws Abertawe a Chastell-nedd Port Talbot yn darparu'r gwasanaeth profi a thrin dolur gwddf.

Gellir asesu a thrin pobl sy'n dioddef o ddolur gwddf mewn fferyllfa gymunedol heb yr angen am apwyntiad gyda meddyg teulu.

Caiff ei reoli o dan y Gwasanaeth Anhwylderau Cyffredin ac mae ar gael i bawb dros bum mlwydd oed.

Yn ystod yr asesiad, bydd y fferyllydd yn penderfynu a yw'n briodol swabio'ch gwddf ac, os felly, bydd y canlyniad yn pennu a yw'r dolur gwddf oherwydd haint bacteriol.

Ar ôl cynnal y prawf swab gwddf, dim ond ychydig eiliadau y bydd yn rhaid i chi aros i dderbyn y canlyniad.

Yn dibynnu ar y canlyniad a'ch symptomau, gall y fferyllydd gynnig triniaeth, heb yr angen i gael presgripsiwn gan feddyg teulu, neu bydd cyngor hunanofal yn cael ei ddarparu.

Gwasanaeth Heintiau'r Llwybr Wrinol (UTI)

Gall menywod sydd â haint y llwybr wrinol nawr gael rhyddhad poen am ddim, os oes angen, ym mhob fferyllfa gymunedol yn Abertawe a Chastell-nedd Port Talbot.

Mae'r gwasanaeth ar gael i'r rhan fwyaf o fenywod rhwng 16 a 64 oed, sydd â symptomau haint llwybr wrinol.

Gall y rhain gynnwys poen neu deimlad llosgi wrth biso, angen mynd i biso yn amlach nag arfer, angen mynd i biso yn sydyn neu'n fwy brys nag arfer ac anghysur yn y stumog isaf, ymhlith symptomau eraill.

Fe'i darperir fel rhan o'r Gwasanaeth Anhwylderau Cyffredin, sy'n golygu bod yn rhaid i chi gofrestru gyda'r fferyllfa i'w gyrchu, sydd ond yn cymryd ychydig funudau.

Bydd fferyllwyr yn cwblhau asesiad clinigol mewn ystafell breifat i benderfynu a oes angen triniaeth. Mewn rhai achosion, efallai y bydd angen prawf wrin.

Os oes angen triniaeth, gall y fferyllydd ddarparu hwn heb i'r claf orfod gweld meddyg teulu. Os byddant yn penderfynu bod angen i chi weld meddyg o hyd, byddant yn eich atgyfeirio.

Gallant hefyd gynnig cyngor hunanofal a gwybodaeth am beth i'w wneud pe bai symptomau'n gwaethygu.

Atal Cenhedlu Brys

Gall eich fferyllfa leol ddarparu mynediad cyfrinachol i wasanaethau atal cenhedlu y GIG, heb angen apwyntiad. Mae'r gwasanaethau sydd ar gael yn cynnwys darparu atal cenhedlu brys, atal cenhedlu a chyngor iechyd rhywiol. Mae'r gwasanaethau hyn ar gael yn rhad ac am ddim os bernir bod y cyflenwad yn briodol yn dilyn ymgynghoriad â fferyllydd achrededig.

Mae atal cenhedlu pontio yn caniatáu i fferyllydd achrededig gynnig cyflenwad tri mis o bilsen atal cenhedlu, i bontio'r bwlch rhwng atal cenhedlu brys a chael gafael ar atal cenhedlu tymor hwy. Mae hyn yn helpu i ganiatáu i gleifion ymchwilio a cheisio cyngor ar eu dewisiadau ar gyfer atal cenhedlu hirdymor.

Dilynwch y ddolen hon i wefan GIG 111 Cymru lle gallwch ddod o hyd i restr o fferyllfeydd sy'n cynnig y gwasanaeth hwn trwy ddewis 'Darparu Atal cenhedlu Brys (EC)' yn y ddewislen hidlo.

Cyflenwad Meddygaeth Frys

Mae'r Gwasanaeth Cyflenwi Meddygaeth Frys yn darparu'r cyflenwad o feddyginiaethau ailadroddus sydd eu hangen ar frys.

Os na allwch gael presgripsiwn dro ar ôl tro ac ni allwch aros nes bod eich presgripsiwn nesaf yn ddyledus, neu fod eich meddyg teulu ar agor, neu os ydych chi allan o'r ardal, gallwch ymweld â'ch fferyllfa leol a allai roi eich meddyginiaeth bresgripsiwn rheolaidd i chi mewn amgylchiadau brys.

Dilynwch y ddolen hon i wefan GIG 111 Cymru lle gallwch ddod o hyd i restr o fferyllfeydd sy'n cynnig y gwasanaeth hwn trwy ddewis 'Cyflenwad Meddygaeth Frys (EMS)' yn y ddewislen hidlo.