Brechiadau MMR
Wrth i achosion o’r frech goch gynyddu ar draws y DU, mae Bwrdd Iechyd Prifysgol Bae Abertawe yn annog plant, pobl ifanc yn eu harddegau ac oedolion nad ydynt wedi cael dau ddos o frechlyn y Frech Goch, Clwy’r Pennau a Rwbela (MMR) i drefnu brechiad gyda’u meddyg teulu cyn gynted â phosibl.
Gall y frech goch wneud plant ac oedolion yn sâl iawn, a bydd rhai pobl sydd wedi'u heintio yn dioddef cymhlethdodau sy'n newid bywydau.
Mae pobl mewn rhai grwpiau sydd mewn perygl, gan gynnwys babanod a phlant ifanc, menywod beichiog, a phobl ag imiwnedd gwan, mewn mwy o berygl o gymhlethdodau oherwydd y frech goch.
Mae’r brechlyn MMR yn ddiogel ac yn effeithiol, ac yn amddiffyn rhag y frech goch, clwy’r pennau a rwbela (brech goch yr Almaen). Mae'r clefydau hyn yn hynod heintus a gallant ledaenu'n hawdd iawn rhwng pobl nad ydynt wedi'u brechu.
Mae’r GIG yn cynnig y dos MMR cyntaf yn 12 mis oed, a’r ail ddos yn 3 oed a 4 mis, gan sicrhau bod plant yn cael eu hamddiffyn yn llawn cyn dechrau’r ysgol. Ystyrir bod plant, pobl ifanc yn eu harddegau ac oedolion a anwyd ar ôl 1970 nad ydynt wedi cael eu brechu, neu sydd wedi cael dim ond un dos o MMR, heb eu diogelu.
Mae’r brechlyn MMR ar gael drwy eich meddyg teulu, am ddim ar y GIG. Cysylltwch â'ch meddyg teulu i drefnu eich brechiad, neu os nad ydych chi'n siŵr a ydych chi neu'ch plentyn wedi cael dau ddos o MMR.
Gallwch hefyd gysylltu â Thîm Imiwneiddio BIP Bae Abertawe ar 01792 200492, i wirio pa ddosau sydd eu hangen arnoch chi neu'ch plentyn.
Nid yw byth yn rhy hwyr i ddal i fyny!
Sesiynau galw heibio brechlyn MMR yn ein Canolfan Brechu Lleol
Oeddech chi'n gwybod y gallwch chi alw i mewn i'n canolfan brechu lleol i gael eich brechlyn MMR?
Mae ein Canolfan Brechu Lleol Gorseinon ar agor Dydd Llun i Dydd Gwener, 9:30yb – 5:30yh.
Rydym yn croesawu gohebiaeth a galwadau ffôn yn y Gymraeg neu'r Saesneg. Atebir gohebiaeth Gymraeg yn y Gymraeg, ac ni fydd hyn yn arwain at oedi.