Mae menter clwstwr yn helpu i frechu cannoedd o gleifion fregus

Mae cannoedd o gleifion bregus wedi cael eu brechiad ffliw gartref diolch i staff y clwstwr.

Cafodd cleifion sy'n gaeth i'r tŷ sy'n byw yn ardaloedd de-ddwyrain a chanolog Abertawe eu brechu gan staff o Grŵp Cydweithredol Clwstwr Lleol Iechyd y Ddinas (LCC).

Mae pob clwstwr yn cynnwys practisau meddygon teulu, deintyddion, optegwyr, fferyllwyr cymunedol, gweithwyr proffesiynol perthynol i iechyd a gwyddorau iechyd, nyrsio cymunedol, rheoli meddyginiaethau, gwasanaethau iechyd meddwl a’r sector gwirfoddol.

Gyda'i gilydd maent yn gweithio gyda'r bwrdd iechyd a phartneriaid eraill i wella iechyd a lles eu poblogaeth leol.

Cafodd cyfanswm o 402 o gleifion a oedd yn gaeth i’r tŷ eu brechu ar ôl i arweinydd y ddau glwstwr, Rhys Jenkins, a pharafeddyg cymunedol y clwstwr, Keith Richards, eu rhoi dros gyfnod o naw diwrnod.

Yn y llun: Keith Richards a Rhys Jenkins.

Mae rôl Keith yn ei weld yn teithio i gartrefi cleifion i'w hasesu fel ffordd o helpu meddygon teulu sy'n gweld cleifion yn eu meddygfeydd.

Dywedodd Rhys, sydd hefyd yn fferyllydd yr LCC: “Mae gennym ni wyth meddygfa sydd â nifer wahanol o gleifion sy'n gaeth i'r tŷ.

“Arweiniwyd y prosiect gan Keith a threfnodd logisteg gyda’r meddygfeydd, gan greu rhestrau o gleifion a llwybrau effeithlon i ni eu cymryd.

“Yna dywedwyd wrth y cleifion pa ddiwrnod y byddem yn ymweld â nhw.

“Maen nhw’n ddiolchgar iawn ein bod ni’n dod allan i’w brechu oherwydd er eu bod nhw’n gaeth i’r tŷ maen nhw’n gallu bod yn ymwybodol o ymwelwyr fel wyrion ac wyresau sy’n gallu eu hamlygu i’r firws.

“Ar y cyfan, fe aeth yn dda iawn ac roedd yn enghraifft dda o waith tîm amlddisgyblaethol ar y cyd â meddygfeydd y clwstwr.”

Mae’r ymgyrch ffliw wedi hen ddechrau ym Mae Abertawe, gyda’r rhai sy’n gymwys yn gallu cael eu brechiad gan eu meddygfa neu wasanaeth fferyllfa gymunedol.

Esboniodd Rhys bwysigrwydd cael y brechiad.

“Mae cael y brechiad blynyddol yn lleihau’r risg o fynd i’r ysbyty a chymhlethdodau mwy difrifol,” meddai.

“Mae cael y brechlyn ffliw nid yn unig yn amddiffyn y sawl sy’n cael y brechiad, ond y rhai o’u cwmpas hefyd.

“Yn gyffredinol, mae cleifion sy’n gaeth i’r tŷ yn fwy agored i effeithiau’r ffliw oherwydd cyfuniad o oedran ac yn aml cyflyrau cronig lluosog.

“Holwch eich meddygfa i weld a ydych yn gymwys i gael brechiad ffliw.”

Os ydych chi'n ansicr a ydych chi'n gymwys ar gyfer y brechiad ffliw, dilynwch y ddolen hon i ddod o hyd i ragor o wybodaeth ar dudalen brechiadau Covid a ffliw ar ein gwefan.