Dweud eich dweud a helpwch i osod y safon ar gyfer gofal diwedd oes

Gall teulu a ffrindiau helpu i siapio ansawdd y gofal a roddir ym Mae Abertawe i anwyliaid yn ystod eu dyddiau olaf trwy rannu eu profiadau.

Mae darparu gofal o ansawdd uchel ar ddiwedd oes person yn un o brif flaenoriaethau Bwrdd Iechyd Prifysgol Bae Abertawe, ond mae eich mewnbwn yn hanfodol i'w gynnal a'i wella.

I wneud hynny, mae arolwg ansawdd a grëwyd gan yr Archwiliad Cenedlaethol o Ofal ar Ddiwedd Oes (NACEL) yn helpu’r bwrdd iechyd i ddeall a yw’r gofal a’r cymorth a roddwyd i glaf, a theulu neu ffrind, wedi cyrraedd y disgwyliadau.

Mae'r arolwg, sy'n cynnwys cwestiynau cyflym, yn cael ei gynnig i berthynas neu ffrind i rywun sydd wedi marw yn ysbytai Treforys, Singleton, Castell-nedd Port Talbot neu Gorseinon. Nid yw'n cael ei gynnig, fodd bynnag, ar gyfer rhai amgylchiadau, megis claf yn marw o fewn pedair awr i gyrraedd yr ysbyty neu o fewn yr Adran Achosion Brys.

Dywedodd Kim Hampton-Evans, Rheolwr Gwasanaeth Gofal ar ôl Marwolaeth: “Mae colli perthynas neu rywun agos yn ddealladwy yn gyfnod anodd iawn ym mywyd person.

“Ein nod yw rhoi’r gofal a’r cymorth gorau posibl i’r claf a’r rhai sy’n agos atynt, ac mae’r arolwg yn hollbwysig er mwyn sicrhau ein bod yn cael gwybod beth rydym yn ei wneud yn dda a lle gallwn wella.

YN Y LLUN: Kim Hampton-Evans, Rheolwr Gwasanaeth Gofal ar ôl Marwolaeth gyda phecyn profedigaeth yn cael ei roi i deulu a ffrindiau.

“Mae pawb yn galaru yn eu ffordd eu hunain, ac efallai na fydd rhai pobl yn teimlo’n barod i roi adborth yn syth ar ôl i’w hanwylyd farw. Ond rydym yn cynnig cyfle i bawb ymateb, a gallant wedyn ei gwblhau pan fyddant yn teimlo eu bod yn barod.

“Rydym yn deall y gall cwblhau’r arolwg ddod ag atgofion ac emosiynau cryf, felly mae ein Gwasanaeth Gofal ar ôl Marwolaeth yn cynnig cefnogaeth o gwmpas hynny.

“Rydyn ni wir yn gwerthfawrogi persbectif a phrofiadau pawb. Mae’r adborth yn rhoi’r cyfle i ni asesu pob agwedd ar y gofal a’r cymorth a ddarparwn.”

Mae’r arolwg wedi’i gynnwys ym mhecyn profedigaeth y bwrdd iechyd, sy’n cael ei roi i deulu neu ffrindiau’r ymadawedig, ac sydd hefyd ar gael drwy e-bost.

Mae strwythur yr arolwg hefyd yn pwysleisio pwysigrwydd cael trafodaethau ag anwyliaid am eu dymuniadau diwedd oes.

Mae cael sgyrsiau didwyll a gonest yn y misoedd a’r wythnosau sy’n arwain at ddiwedd eu hoes yn cynnig cyfle diogel i bobl rannu’r hyn sy’n bwysig iddyn nhw ar gyfer cam olaf eu bywyd. Gallai hynny ganolbwyntio ar yr opsiynau triniaeth a allai fod orau i’r unigolyn hwnnw, neu gallai fod wedi’i ganoli ar anghenion crefyddol, ysbrydol neu gymdeithasol.

Gall arwain at welliant yn y gofal diwedd oes a ddarperir a lleihau'r baich ar deuluoedd neu ffrindiau agos. Mae'n aml yn lleddfu pryder - gan na fydd yn rhaid i berthnasau wneud penderfyniadau ar ran eu hanwyliaid, gan boeni am beth i'w wneud am y gorau. Gall hefyd osgoi triniaethau ymledol diangen neu ofer, gan gynnig ffordd fwy heddychlon o farw i bobl.

YN Y LLUN: Mae ymgynghorydd Gofal Lliniarol Arbenigol Sue Morgan yn annog aelodau'r teulu i ddechrau cael sgyrsiau am ddymuniadau diwedd oes.

Gall anghenion pob person amrywio, ond yr un yw'r ffocws – yr hyn sy'n bwysig iddynt.

Dywedodd Sue Morgan, Ymgynghorydd mewn Gofal Lliniarol Arbenigol: “Eleni, mae ein tîm Gofal Diwedd Oes yn canolbwyntio ar 'Gynllunio Gofal Ymlaen Llaw a'r Dyfodol'.

“Mae hyn yn golygu cydnabod cleifion sy’n dod i ddiwedd eu hoes ar y cam cynharaf posibl, a chynhyrchu sgyrsiau ynghynt fel bod eu dymuniadau’n cael eu trafod, eu cofnodi a’u parchu.

“Po gyntaf yr amlygir hyn, y mwyaf o amser y mae’n rhoi’r cyfle i’r claf, aelodau’r teulu a gweithwyr gofal iechyd proffesiynol roi pethau yn eu lle. Bydd hefyd yn gyfle i gael y sgyrsiau 'diolch, maddau i mi, rydw i'n maddau i chi, rydw i'n dy garu di'.

“Trwy gael y sgyrsiau hyn mae’n ein galluogi i gynllunio gofal o amgylch yr hyn sy’n bwysig i’r claf.”

Gallwch gyrchu ein hadran Gofal Lliniarol a Diwedd Oes bwrpasol ar ein gwefan trwy glicio ar y ddolen hon.