Gwobr genedlaethol am arweinydd nyrsio ysbrydoledig

Prif lun: Hazel Powell, canol, ac o’r chwith i’r dde Emily Davies, Cyfarwyddwr Cyswllt Nyrsio a Phrofiad Cleifion Dros Dro, Paul Stuart Davies, Dirprwy Gyfarwyddwr Nyrsio a Phrofiad Cleifion Dros Dro, y Rheolwr Busnes Carwyn Davies, Swyddog Nyrsio Gillian Knight a Mark Madams, Cyfarwyddwr Nyrsio Cyswllt.

Cafodd arweinydd nyrsio ysbrydoledig ei synnu gyda Gwobr Rhagoriaeth Cymru Prif Swyddog Nyrsio (CNO) ar ei diwrnod olaf gyda Bae Abertawe.

Enwebwyd Hazel Powell am ei gwaith sydd wedi gweld nifer y cwympiadau cleifion mewn ysbytai yn gostwng yn is na’r cyfartaledd ar gyfer Cymru a, thrwy weithio mewn partneriaeth, gostyngiad aruthrol mewn cwympiadau mewn cartrefi gofal.

Mae hi hefyd wedi hyrwyddo hyfforddiant a datblygiad gyrfa nyrsys a bydwragedd ar bob lefel, gan gynnwys y rhai sydd wedi dod o dramor.

Cyflwynodd y Swyddog Nyrsio Gillian Knight y wobr i Hazel ar ran y Prif Swyddog Nyrsio, Sue Tranka.

Dywedodd Gillian: “Mae gennych chi gwmpawd moesol sy'n hollol gywir ac egni a brwdfrydedd i wneud pethau'n well i'r proffesiwn sy'n amlwg ac yn diferu gennych chi. Rydych chi'n gydweithiwr gwych ac mae gennych chi'r gallu i ddod â thîm gyda chi sy'n amlwg o'r cyflwyniad o'ch amser yma ym Mae Abertawe."

Wrth annerch ei chydweithwyr dywedodd Hazel: “Mae hyn yn golygu llawer i mi oherwydd eich bod chi wedi dod.”

Daw Hazel yn wreiddiol o’r Alban a chymhwysodd fel nyrs iechyd meddwl gofrestredig yn 1990.

Mae hi wedi bod gyda’r bwrdd iechyd ers naw mlynedd i gyd, gan ddechrau yn 2016 fel Cyfarwyddwr Nyrsio Iechyd Meddwl ac Anableddau Dysgu.

Yn dilyn secondiad i Lywodraeth Cymru fel uwch gynghorydd proffesiynol i Swyddfa’r Prif Swyddog Nyrsio, roedd Hazel yn Ddirprwy Gyfarwyddwr Gweithredol Nyrsio a Phrofiad Cleifion ym Mae Abertawe rhwng mis Mawrth 2022 a mis Mawrth 2024.

Mae hi wedi dal swydd Cyfarwyddwr Gweithredol Nyrsio Dros Dro ers 2024. Bydd yn parhau â’i gyrfa yn Ymddiriedolaeth GIG Partneriaeth Dyfnaint fel Prif Swyddog Nyrsio ac arweinydd Proffesiynau Perthynol.

Roedd yr enwebiad, a gyflwynwyd gan gydweithwyr agos, yn nodi sut yr arweiniodd Hazel ddatblygiad Strategaeth Ansawdd Bae Abertawe a strwythurau ansawdd a diogelwch diwygiedig, gan ymgysylltu â grwpiau clinigol a darparu a gwreiddio systemau newydd yn gyflym.

Mae hi hefyd wedi arwain y ffordd wrth ddatblygu Bae Abertawe fel lle gwych i weithio i nyrsys tramor, gan sicrhau eu bod yn cael eu cefnogi i symud ymlaen yn eu gyrfaoedd.

Ac, o ganlyniad uniongyrchol i sgyrsiau Beth sy'n Bwysig i Mi? gyda nyrsys a bydwragedd, sefydlwyd Academi Nyrsio a Bydwreigiaeth i gynnig cyfres o gyfleoedd datblygu i nyrsys a bydwragedd, gan gynnwys rhaglenni arweinyddiaeth.

Mae Gwobrau Rhagoriaeth y CNO yn cydnabod ymroddiad, arloesedd a rhagoriaeth wrth gefnogi poblogaeth Cymru.

Mae disgwyl i Elizabeth Rix ymgymryd â swydd Cyfarwyddwr Gweithredol Nyrsio ym Mae Abertawe fis nesaf.