Gwaith therapyddion galwedigaethol wedi'i ddal i fyny fel enghraifft ar gyfer therapyddion ledled y DU

Dylai gwaith therapyddion ym Mae Abertawe sy'n helpu pobol oresgyn cyflyrau meddyliol a chorfforol gael ei ddefnyddio fel enghraifft ar gyfer gweddill y DU, yn ôl arbenigwyr.

Mae Therapyddion Galwedigaethol yn helpu pobl â heriau iechyd corfforol neu feddyliol, neu ag anableddau dysgu, i wella eu gallu i wneud tasgau bob dydd os ydynt yn cael anawsterau, gan gynnwys darparu cymorth gyda sgiliau echddygol, prosesu synhwyraidd a hunanofal.

Mae Coleg Brenhinol y Therapyddion Galwedigaethol yn gosod y safonau proffesiynol ac addysgol ar gyfer y proffesiwn iechyd a gofal cymdeithasol, ac mae Therapyddion Galwedigaethol Bae Abertawe wedi bod yn rhannu eu gwybodaeth a'u gwaith gyda'r Coleg, gan wneud cymaint o argraff ar arweinwyr eu bod wedi galw ar waith sy'n cael ei wneud yn y rhanbarth i osod 'templed' ar gyfer gweddill y wlad.

Mae’n dilyn cyflwyniad gan dri therapyddion galwedigaethol bwrdd iechyd mewn cynhadledd rithwir a gynhaliwyd gan Goleg Brenhinol y Therapyddion Galwedigaethol, a wahoddodd eraill o bob rhan o’r DU i ddysgu oddi wrth ei gilydd.

Yna gwahoddwyd cydweithwyr i’r Senedd i drafod gwaith pellach sy’n cael ei wneud ym Mwrdd Iechyd Prifysgol Bae Abertawe gyda’r Gweinidog dros Iechyd a Gwasanaethau Cymdeithasol Eluned Morgan – Prif Weinidog newydd Cymru bellach.

Dywedodd Dirprwy Bennaeth Therapyddion Galwedigaethol Robert Workman: “Mae cynhadledd y Coleg Brenhinol Therapi Galwedigaethol yn ddigwyddiad blynyddol i bobl ledled y DU rannu’r hyn y maent yn ei wneud.

“Mae’n ddigwyddiad enfawr yng nghalendr therapi galwedigaethol y wlad hon, ac roedd yn gyfle gwych i Fae Abertawe gael gwahoddiad i siarad.

“Ac nid oedd yn ymwneud â Bae Abertawe’n unig – mae gan wledydd gwahanol bethau gwahanol yn digwydd, ac roedd yn gyfle i roi Cymru ar y map.”

Siaradodd ThG Thomas Williams â’r gynhadledd am sut olwg fydd ar therapi ThG ymhen deng mlynedd, tra rhannodd Arweinydd Addysg, Ymchwil a Datblygu Ymarfer, ThG, Laura Ingham, ei hastudiaeth lefel PhD gyfredol, gan archwilio’r dulliau gwerthuso y mae therapyddion galwedigaethol yn eu defnyddio mewn rolau gofal sylfaenol.

Yn y cyfamser, ymunodd Mr Workman â thrafodaethau ar ddyfodol y gweithlu ThG, a'i ran yn natblygiad Cynllun Gweithredu Strategaeth Gweithlu RCOT i Gymru.

Meddai Robert: “Cymru yw’r gyntaf o’r gwledydd cartref i ddatblygu cynllun gweithredu felly roeddem yn awyddus i rannu ein meddyliau.”

Bu cynrychiolwyr o Goleg Brenhinol y Therapyddion Galwedigaethol hefyd yn ymweld â phencadlys Bwrdd Iechyd Prifysgol Bae Abertawe ym Maglan i ddysgu am y gwaith sy'n cael ei wneud i ddatblygu gwasanaethau therapi galwedigaethol mewn gofal sylfaenol.

Rhannodd Therapyddion Galwedigaethol sy'n gweithio mewn Wardiau Rhithwir a Chlystyrau Meddygon Teulu, dan arweiniad yr Arweinydd Clinigol ThG Alex Gigg, eu profiadau gyda Chynghorydd Proffesiynol RCOT Genevieve Smyth, Arweinydd Polisi a Materion Cyhoeddus Joseph Brunwin ac Arweinydd Ymarfer Proffesiynol Cymru Dai Davies.

Dywedodd Genevieve Smyth wrth y cynulliad: “Gallwn deimlo llawenydd a balchder yn yr ystafell. Rydych chi'n dempled o'r hyn rydyn ni ei eisiau ar draws y DU gyfan.”