Cleifion yn dangos eu talentau yng Ngemau Olympaidd Cefn Coed

LLUN: Mae staff a chleifion Ysbyty Cefn Coed wedi cael ei ysbrydoli gan y Gemau Olympaidd.

Mae'n bosibl bod athletwyr elitaidd y byd yn mynd am yr aur ym Mharis, ond mae gwir werthoedd y Gemau Olympaidd yn cael eu gweithredu'n nes adref, yn Ysbyty Cefn Coed Abertawe.

Mae cleifion a staff wedi dod at ei gilydd i gynnal eu Gemau Olympaidd eu hunain drwy gynnal digwyddiadau gwahanol ar draws tair ward.

Doedd dim medalau aur ar gael na miliynau yn gwylio ymlaen, ond cleifion o wardiau Celyn, Derwen ac Onnen o fewn uned Ysbryd Y Coed yr ysbyty oedd yr enillwyr.

YN Y LLUN: Claf John Drummond, nyrs Zoe Green, ffisiotherapydd Jacqueline Coates, therapyddion galwedigaethol Joanna Clarke a Katie Ley ynghyd â gweithiwr cymorth gofal iechyd Therese Shadbolt.

Buont yn helpu staff i greu baneri a fflachlampau  yn y cyfnod cyn y gemau, cyn cymryd rhan mewn amrywiaeth o ddigwyddiadau a oedd yn cynnwys pêl-fasged, beicio sefydlog, bowlio a hyd yn oed ras gyfnewid y tu mewn i'r adeilad.

Er bod natur hwyliog y Gemau Olympaidd cartref yn cefnogi ffitrwydd corfforol, roedd manteision eraill yn cynnwys hyrwyddo gwaith tîm a lles.

Mae'n rhan o fenter Awst Actif Bwrdd Iechyd Prifysgol Bae Abertawe, mis sy'n ymroddedig i helpu pobl hŷn i symud mwy i hybu eu hiechyd a'u lles cyffredinol.

Mae Michael Barber, ffisiotherapydd a Joanna Clarke, therapydd galwedigaethol o fewn y gwasanaeth Cleifion Mewnol Oedolion Hŷn, ymhlith y staff y tu ôl i ddigwyddiad Gemau Olympaidd Cefn Coed ynghyd â gweithiwr cymorth gofal iechyd Josie Callaghan.

Dywedodd Michael: “Mae’n ddigwyddiad sy’n ennyn cymaint o ddiddordeb ledled y byd, ac roeddem yn awyddus i fanteisio ar hynny a’i ddefnyddio fel cyfle i gynnwys ein cleifion a’u cael i fod yn actif ac i’w cynnwys mewn gweithgareddau.

“Bu rhywfaint o gystadleuaeth gadarnhaol rhwng y wardiau yma – roedd pawb eisiau gwneud eu gorau a helpu eu ward i ddod i’r brig! Maen nhw wedi bod yn gwylio'r Gemau Olympaidd ar y teledu, felly mae'r awydd hwnnw yn bendant wedi disgleirio.

“Roedd yn braf iawn gweld pawb yn dod at ei gilydd ac yn mwynhau ein fersiwn ni o ddigwyddiad y mae athletwyr gorau’r byd yn cystadlu ynddo ar hyn o bryd.”

Dywedodd Josie: “Rydym wedi cael llawer o hwyl gyda chleifion yn ystod yr wythnos neu ddwy ddiwethaf yn ymchwilio i'r Gemau Olympaidd ac yn crefftio eitemau mewn pryd ar gyfer y digwyddiad. Fe wnaethom hefyd drefnu bwffe i ddathlu dechrau'r gemau.

YN Y LLUN: Profodd y claf Magnus Smith yn da iawn mewn bowlio.

Er bod y cleifion wedi cymryd rhan ganolog yn y digwyddiadau, roedd staff o rolau amrywiol hefyd yn elwa o gymryd rhan.

Dywedodd Rebecca Mort, Nyrs Arweiniol Gwasanaethau Iechyd Meddwl Pobl Hŷn: “Mae wedi bod yn bleser gweld y tîm amlddisgyblaethol yn dod at ei gilydd i drefnu’r digwyddiadau hyn gyda chanlyniadau mor gadarnhaol.

“Mae’r wardiau wedi bod yn llawn cyffro yn ystod yr ychydig wythnosau diwethaf wrth baratoi ar gyfer y digwyddiad hwn a chynnal y gweithgareddau amrywiol ar thema Olympaidd.

“Mae’r staff a’r cleifion wedi elwa o gymryd rhan, gan greu awyrgylch o hwyl sydd wedi rhoi hwb i les, cystadleuaeth o natur dda ac annog gweithgareddau corfforol a gwaith tîm.”