Canser

Eich taith canser yn Abertawe a Chastell-nedd Port Talbot

Rhagwelir y caiff hyd at un o bob dau berson ddiagnosis o ganser, a bydd y nifer hwn yn parhau i gynyddu. Serch hynny, mae llawer yn cael eu trin yn llwyddiannus ac yn gwella o'u clefyd.

Mae derbyn diagnosis o ganser, neu hyd yn oed yr amheuaeth o ganser, yn ddechrau ar daith canser – taith a all fod yn llethol os nad ydych yn ymwybodol o'r hyn y mae'n ei olygu.

Yn Bae Abertawe, ein nod yw gwneud eich taith mor syml â phosibl, gan eich cadw'n wybodus drwy'r amser. Gobeithiwn y bydd darparu trosolwg o'n gwasanaethau ac egluro rhai o'r camau ar daith canser yn lleddfu peth o'ch pryder ac yn rhoi sicrwydd ynghylch y gofal a ddarparwn.

Mae gan Bae Abertawe dri safle ysbyty: Ysbyty Treforys, Ysbyty Singleton ac Ysbyty Castell-nedd Port Talbot. Gall cleifion gael eu profion diagnostig neu eu llawdriniaeth ar unrhyw un o'r safleoedd hyn. Dywed Derrian Markham, Arweinydd Clinigol y bwrdd iechyd ar gyfer canser: "Ein nod yw gwneud diagnosis a thrin cleifion mor agos â phosibl at eu cartrefi."

Cyn gynted ag y derbyniwn atgyfeiriad brys oherwydd amheuaeth o ganser, caiff eich taith ei monitro gan dîm gweinyddol sy'n arbenigo mewn canser, gan sicrhau eich bod yn symud drwy bob cam o'ch llwybr mor gyflym â phosibl.

Gall eich meddyg teulu ofyn am brofion i wneud diagnosis o'r canser. Gallai'r rhain gynnwys profion gwaed, pelydrau-X, uwchsain neu sganiau CT. Er mwyn osgoi oedi yn eich llwybr, efallai y cewch eich atgyfeirio am brofion arbenigol pellach cyn gweld ymgynghorydd yn yr ysbyty; gelwir hyn yn 'syth i'r prawf'. Gallai'r profion hyn gynnwys MRI, endosgopi neu PET CT (sy'n cael eu cynnal yn ganolog yn Singleton) a gellir eu gwneud yn unrhyw un o'n tri safle ysbyty.

Os gwneir diagnosis o ganser, rhoddir blaenoriaeth i chi a gofynnir i chi weld ymgynghorydd mewn clinig cleifion allanol. Yn y cam hwn, byddwch yn cael gweithiwr allweddol, sydd fel arfer yn nyrs arbenigol glinigol. Y person hwn fydd eich un pwynt cyswllt ar gyfer unrhyw gwestiynau neu bryderon sydd gennych.

Caiff pob claf sydd wedi cael diagnosis o ganser ei drafod mewn cyfarfod arbenigol o'r enw MDT (Tîm Aml-ddisgyblaethol), sy'n cynnwys llawfeddygon, oncolegwyr, radiolegwyr, nyrsys a phatholegwyr. Mae'r tîm yn grŵp o arbenigwyr sy'n arbenigo mewn math penodol o ganser, ac mae'r cyfarfod yn gyfle pwysig i drafod eich diagnosis o ganser a'ch opsiynau triniaeth.

Gall cleifion sydd angen llawdriniaeth i drin eu canser gael eu trin yn un o'n tri safle ysbyty. Cynhelir triniaethau llawfeddygol mwy cymhleth yn Ysbyty Treforys, gan fod yr uned gofal dwys wedi'i lleoli yno.

Mae rhai mathau o ganser, fel canser yr ymennydd, sarcoma a chanser yr afu, yn gofyn am lawdriniaeth mewn canolfannau mwy arbenigol y tu allan i ardal Bae Abertawe, er enghraifft ym Mirmingham a Chaerdydd. Os byddwch yn cael eich llawdriniaeth y tu allan i ardal Bae Abertawe, byddwch yn parhau o dan ofal eich ymgynghorydd lleol.

Mae Bae Abertawe yn gartref i Ganolfan Ganser De-orllewin Cymru, sydd wedi'i lleoli yn Ysbyty Singleton. Dyma un o dair canolfan ganser dynodedig yn unig yng Nghymru, ac mae'n darparu triniaethau heblaw llawdriniaeth, megis cemotherapi, imiwnotherapi a radiotherapi.