Gwaith ar y gweill ar uned dialysis newydd a fydd yn arbed taith hir i gleifion Pen-y-bont ar Ogwr

Mae gwaith bellach yn mynd rhagddo ar uned dialysis newydd ym Mhen-y-bont ar Ogwr fel rhan o fuddsoddiad 10 mlynedd gwerth £70 miliwn ar draws De Cymru.

Mae’r datblygiad mewn hen gampfa yng nghanolfan siopa’r Triongl ym Mracla yn un o ddwy uned newydd y mae Bwrdd Iechyd Prifysgol Bae Abertawe yn eu datblygu mewn ymateb i gynnydd sydyn yn y galw.

Mae gwasanaethau arennol yn cael eu darparu gan Fae Abertawe ar gyfer pobl yn ei ardal ei hun yn ogystal â’r rhai ym myrddau iechyd Hywel Dda a Chwm Taf Morgannwg.

Mae gwasanaethau presennol yn cynnwys dwy uned haemodialysis yn Ysbyty Treforys – sy’n derbyn cleifion o Abertawe, Castell-nedd Port Talbot a Phen-y-bont ar Ogwr – ac un yr un yn Aberystwyth, Caerfyrddin a Hwlffordd.

Gyda chyllid gan Bwyllgor Comisiynu ar y Cyd GIG Cymru, mae rhai gwelliannau mawr eisoes wedi’u cyflawni, megis uwchraddio’r pum uned haemodialysis bresennol yn Ne-orllewin Cymru.

(Sarah Siddell, Rheolwr Cyfarwyddiaeth Arennol, Ysbyty Treforys, a Metron Arennol Lisa Morris)

Mae dau o'r rhain yn Ysbyty Treforys, gydag un yr un yn Aberystwyth, Caerfyrddin a Hwlffordd. Mae cleifion yno eisoes yn elwa o beiriannau dialysis newydd a chyfleusterau ac offer eraill.

Fodd bynnag, mae'r bwrdd iechyd hefyd yn cydnabod bod angen unedau dialysis ychwanegol, sy'n cwmpasu ardaloedd Castell-nedd Port Talbot a Phen-y-bont ar Ogwr.

Bydd hyn yn galluogi cleifion, sy'n gorfod teithio i Dreforys neu Lantrisant ar hyn o bryd, i gael triniaeth yn nes at eu cartrefi.

Bydd hefyd yn lleddfu rhywfaint o’r pwysau ar Dreforys, lle mae galw cynyddol wedi arwain at orfod dialysu rhai cleifion gyda’r nos, nad yw’n ddelfrydol.

Bydd uned Pen-y-bont ar Ogwr yn cael ei rhedeg ar ran Bae Abertawe gan Fresenius Medical Care, sydd hefyd yn rhedeg y tair uned yng ngorllewin Cymru, a rhagwelir y bydd yn agor ym mis Tachwedd.

Bydd yn cynnwys 21 o orsafoedd dialysis gydag uchafswm o 84 o gleifion i ganiatáu ar gyfer cynnydd yn y galw yn y dyfodol – pob un ohonynt yn dialysis yn ystod y dydd.

Dywedodd Sarah Siddell, Rheolwr Cyfarwyddiaeth ar gyfer arennol: “Mae dechrau’r gwaith yn garreg filltir, sy’n arwydd o gynnydd sylweddol yn narpariaeth gwasanaethau i gleifion arennol ym Mhen-y-bont ar Ogwr ac ar draws De Orllewin Cymru.

“Bydd yr uned dialysis bwrpasol, fodern hon yn galluogi cleifion i gael mynediad at ofal yn agos at eu cartrefi, gan wella ansawdd eu bywyd trwy leihau amser teithio a derbyn gofal mewn lleoliad mwy cyfleus.

“Mae’r adborth gan gleifion ynglŷn â’r dyddiad agor amcangyfrifedig wedi bod yn galonogol iawn. Maent yn edrych ymlaen yn eiddgar at ei ddefnydd.

“Rwy’n cymeradwyo ymdrechion tîm arennol Bae Abertawe, Rhwydwaith Arennau Cymru a Fresenius am eu hymroddiad i gyrraedd y garreg filltir hon. Mae eu gwaith caled a’u hymrwymiad wedi bod yn rhan annatod o’n cynnydd.”

(Mae Phil Pearson, ar y dde bellaf, rheolwr contractau Sandycroft Projects, yn esbonio i gynrychiolwyr Bwrdd Iechyd Prifysgol Bae Abertawe a Fresenius Medical Care sut y bydd cyn campfa Physique ym Mracla yn cael ei hehangu a'i thrawsnewid yn ganolfan dialysis newydd)

Yn y cyfamser, mae tîm arennol Bae Abertawe a Fresenius hefyd yn cydweithio ar gynlluniau ar gyfer yr uned newydd ar gyfer Castell-nedd Port Talbot, sydd i fod i agor rhywbryd y flwyddyn nesaf.

Cafodd safle ei nodi ym Mhort Talbot, dim ond i hwnnw ddod yn ddim ar gael am resymau y tu hwnt i reolaeth y bwrdd iechyd.

“Rydym wedi cysylltu â Chyngor Castell-nedd Port Talbot i ddod o hyd i safleoedd amgen,” ychwanegodd Sarah.

“Mae un bellach wedi’i nodi a, thra byddwn yn parhau i chwilio am leoliadau eraill, bydd cais cynllunio’n cael ei gyflwyno i osgoi oedi os na fydd safle arall ar gael.”