Arlunydd yn goleuo coridor yr ysbyty gyda gwedd newydd ddisglair

YN Y LLUN: Nyrsys staff Victoria Laurie (chwith) a Maitha Price o flaen y ffenestri wedi'u paentio ar hyd coridor yr adran achosion brys.

Mae arlunydd caredig wedi bywiogi coridor Ysbyty Treforys am ddim.

Mae Ric Kane wedi rhoi sblash o liw i'r adran rhwng yr adrannau brys i oedolion a phlant.

Daeth ei ystum ar ôl i fab ffrind gael triniaeth gan yr Uned Argyfwng Plant (CEU) yn dilyn anaf i'w ben.

Cynigiodd beintio pob ffenestr ger yr uned gyda'i thema unigol ei hun.

Ar ben hynny, mae wedi creu themâu unigol ar gyfer pob cilfach claf o fewn CEU.

YN Y LLUN: Ric Kane gyda'r dyluniadau a beintiodd am ddim ar y ffenestri.

Dywedodd Ric, 58, o Dreboeth: “Pan oeddwn yn yr uned, gwnaeth y gofal a roddwyd i fab fy ffrind argraff fawr arnaf. Roedd yn rhagorol – ni wnaethom aros yn hir iawn ac roedd y staff i gyd yn ofalgar iawn.

“Roeddwn i eisiau gwneud rhywbeth i’w had-dalu am hynny. Sylwais fod y ffenestri wedi eu peintio yn barod, ond soniais fy mod yn arlunydd a dylunydd ac y byddwn yn eu hail-ddylunio yn rhad ac am ddim pe byddent yn fodlon ar hynny.

“Felly cynlluniais y ffenestri gyda thema ar gyfer pob un. Gofynnwyd i mi a allai un fod yn olygfa gaeafol, felly penderfynais wneud carw gyda choed a chaeau. Mae gan y ffenestri eraill fwy o liwiau llachar a fydd, gobeithio, yn rhoi gwên ar wynebau unrhyw un sy’n mynd drwy’r ardal honno.”

Roedd y ffenestr wedi'i defnyddio o'r blaen ar gyfer hyrwyddo ymgyrchoedd ymwybyddiaeth gan gynnwys diogelwch dŵr, ac mae hefyd wedi arddangos posteri costau byw.

Dywedodd Victoria Laurie, nyrs staff CEU: “Mae’r paentiadau wedi bywiogi coridor yr Adran Achosion Brys, ac rydym wedi derbyn llawer o ganmoliaeth gan gleifion, ymwelwyr a staff sydd wedi mynd drwyddo.

“Er nad ysbyty yw’r lle mae pobl eisiau bod, mae dyluniadau Ric wedi rhoi gwen ar wynebau ac i rai mae wedi newid eu ffocws ac wedi rhoi rhywbeth gwahanol iddynt edrych arno a siarad amdano am ychydig o amser.

“Mae ei gynnig i’w wneud yn rhad ac am ddim yn cael ei werthfawrogi’n fawr. Rydym hefyd yn falch iawn o glywed ei ganmoliaeth o'r gofal a gafodd mab ei ffrind tra yn CEU. Mae clywed adborth cadarnhaol yn rhoi hwb gwirioneddol i’n staff.”

YN Y LLUN: Dyluniodd Ric themâu gwahanol ar gyfer pob ffenestr.

Nid dyma'r tro cyntaf i Ric roi o'i amser i helpu'r GIG.

Yn ystod cyfnod cloi cyntaf Covid peintiodd ddyluniadau ar gyfer siopau a safleoedd busnes eraill yn gyfnewid am iddynt roi rhodd i elusennau'r GIG.

Ychwanegodd Ric: “Yn ystod Covid roedd y gefnogaeth i’r GIG yn wych, a gwnes fy rhan drwy beintio i fusnesau am ddim ar y sail y byddent yn rhoi i’r GIG.

“Dyma’r cyfle cyntaf i mi ei gael i helpu Bwrdd Iechyd Prifysgol Bae Abertawe, ac rydw i mor hapus y gallwn i wneud rhywbeth i helpu i roi gwen ar wynebau.”