Dyletswydd Gonestrwydd - canllaw defnyddiwr gwasanaeth

Dylai didwylledd a gonestrwydd fod wrth wraidd pob perthynas rhwng y rhai sy'n darparu triniaeth a gofal a'r rhai sy'n ei brofi.

Beth yw'r Ddyletswydd Gonestrwydd?

Mae’r Ddyletswydd Gonestrwydd yn ofyniad cyfreithiol i Sefydliadau’r GIG yng Nghymru fod yn agored ac yn onest gyda defnyddwyr gwasanaethau sy’n derbyn gofal a thriniaeth. Amlinellir hyn yn Neddf Iechyd a Gofal Cymdeithasol (Ansawdd ac Ymgysylltu) (Cymru) 2020.

Mae’r Ddyletswydd Gonestrwydd yn berthnasol os yw’r gofal a ddarparwn wedi, neu y gallai fod wedi cyfrannu at niwed neu farwolaeth gymedrol neu ddifrifol annisgwyl neu anfwriadol.

Ein nod

Yn y GIG, rydym yn ymdrechu i ddarparu gofal diogel a thosturiol o ansawdd uchel i bob un o’n defnyddwyr gwasanaeth. Fodd bynnag, hyd yn oed pan fyddwn yn gwneud ein gorau, gall pobl brofi niwed weithiau. Dyna pam mae gennym y Ddyletswydd Gonestrwydd.

Ein nod yw creu diwylliant o ymddiriedaeth a didwylledd, fel y gallwch deimlo'n hyderus yn y gofal a gewch gennym.

Beth a olygir gan niwed cymedrol neu ddifrifol?

Niwed Cymedrol : Mae defnyddiwr gwasanaeth yn profi cynnydd cymedrol mewn triniaeth a niwed sylweddol ond nid parhaol, ac mae’r gofal a ddarparwyd gan y GIG wedi cyfrannu neu efallai fod hynny wedi cyfrannu. Er enghraifft, rhoddir meddyginiaeth iddynt er bod hyn wedi'i gofnodi yn eu nodiadau fel alergedd, ac mae hyn yn arwain at adwaith sylweddol sy'n gofyn am bedwar diwrnod neu fwy yn yr ysbyty cyn gwella.

Niwed Difrifol: Mae defnyddiwr gwasanaeth yn profi anabledd parhaol neu'n colli swyddogaeth ac mae gofal y GIG wedi cyfrannu neu efallai fod hynny wedi cyfrannu. Er enghraifft, rhoddir meddyginiaeth iddynt er bod hyn wedi'i ddogfennu yn eu nodiadau fel alergedd, ac mae hyn yn arwain at niwed i'r ymennydd neu niwed parhaol arall i organau.

Marwolaeth: Mae defnyddiwr gwasanaeth yn marw ac fe wnaeth gofal y GIG gyfrannu at y farwolaeth neu efallai fod hynny wedi cyfrannu ato. Er enghraifft, rhoddir meddyginiaeth iddynt er bod hyn wedi'i ddogfennu yn eu nodiadau fel alergedd, ac mae hyn yn arwain at eu marwolaeth.

Beth allwch chi ei ddisgwyl?

Dyma grynodeb o’r Weithdrefn Dyletswydd Gonestrwydd y bydd y GIG yn ei dilyn:

· Wrth ddod yn ymwybodol yn gyntaf bod y ddyletswydd gonestrwydd yn berthnasol, rhaid i'r GIG hysbysu'r defnyddiwr gwasanaeth neu berson sy'n gweithredu ar ei ran. Dylai'r cyswllt hwn fod 'yn bersonol', sy'n golygu dros y ffôn, galwad fideo neu wyneb yn wyneb.

Pwrpas yr hysbysiad ‘yn bersonol’ yw cynnig ymddiheuriad, rhoi esboniad o’r hyn sy’n hysbys bryd hynny, cynnig cymorth, egluro’r camau nesaf a darparu manylion pwynt cyswllt.
Anfonir llythyr at y defnyddiwr gwasanaeth neu'r person sy'n gweithredu ar ei ran o fewn pum diwrnod gwaith, yn cadarnhau'r hyn a ddywedwyd yn yr hysbysiad 'yn bersonol'.
Bydd y GIG yn cynnal ymchwiliad i ddarganfod beth ddigwyddodd a pham, a sut y gallwn ei atal rhag digwydd eto.
Bydd hyn yn digwydd yn unol â Gweithdrefn 'Gweithio i Wella' GIG Cymru.
Bydd y pwynt cyswllt a enwir a ddarperir fel rhan o'r weithdrefn Dyletswydd Gonestrwydd yn rhoi mwy o wybodaeth i chi am y broses hon a'r hyn sy'n digwydd nesaf.
Os nad ydych am i ni gysylltu â chi, neu os byddai’n well gennych i rywun weithredu ar eich rhan, rhowch wybod i ni a byddwn yn gwneud y trefniadau angenrheidiol.

Ymddiheuriad

Mae gwneud ymddiheuriad ystyrlon yn rhan bwysig o'r weithdrefn Dyletswydd Gonestrwydd. Mae ymddiheuriad yn fynegiant o dristwch neu ofid am y niwed a brofwyd. Fodd bynnag, nid derbyn bai nac atebolrwydd cyfreithiol yw ymddiheuriad.

Cefnogaeth pellach

Os oes gennych unrhyw gwestiynau, angen rhagor o wybodaeth, neu os hoffech arweiniad, ewch i'n gwefan neu cysylltwch â'r sefydliad lle cawsoch eich gofal.

Dilynwch y ddolen hon am ragor o wybodaeth gan gynnwys manylion cyswllt sefydliadau’r GIG yng Nghymru.