Diabetes Math 2

Pam mae hyn yn bwysig?

Os nad yw lefelau siwgr eich gwaed wedi'u rheoli'n dda cyn llawdriniaeth, gall hyn gynyddu'r risg o heintiau, arafu iachâd, a gwneud adferiad yn anoddach. Mae rheoli diabetes yn dda yn eich helpu i gadw'n ddiogel ac yn gwella'ch adferiad ar ôl llawdriniaeth.

Mae angen i chi gadw llygad ar eich iechyd a chael archwiliadau rheolaidd os oes gennych ddiabetes math 2 oherwydd os na chaiff ei reoli'n dda gall arwain at:

Clefyd y galon a strôc
Difrod i'r nerfau (colli teimlad a phoen)
Problemau traed fel doluriau a heintiau
Colli golwg a dallineb
Problemau arennau
Camesgoriad a marw-enedigaeth

Rheoli eich siwgr gwaed a chael adolygiadau diabetes rheolaidd yw'r ffordd orau o leihau eich risg o gymhlethdodau.

Pan gewch eich adolygiad diabetig, byddwch yn cael prawf gwaed HbA1c, sy'n dangos eich siwgr gwaed cyfartalog dros y 3 mis diwethaf. Os yw eich HbA1c yn rhy uchel, efallai y bydd eich llawdriniaeth yn cael ei gohirio.

Nawr – nid dim ond cyn llawdriniaeth – yw'r amser gorau i ddechrau dilyn y cyngor a roddwyd i chi i wella'ch siwgr gwaed a'ch iechyd cyffredinol. Gall wneud gwahaniaeth mawr.

Yr hyn sydd angen i chi ei wneud:

Bwyta ddeiet cytbwys iach a chadw'n actif; i wella'ch siwgr gwaed, rheoli pwysau a theimlo'n well yn gyffredinol.
Cymryd eich meddyginiaethau diabetes neu inswlin fel y'u rhagnodir.
Mynychu eich adolygiadau arferol gyda'ch fferyllydd ymarfer, nyrs ymarfer, meddyg teulu neu dîm diabetes a dilynwch y cyngor a roddir yn ystod yr adolygiadau hyn.
Mynychu unrhyw brofion neu apwyntiadau yn ôl argymhelliad eich tîm ysbyty.
Dweud wrth eich meddyg neu fferyllydd os byddwch chi'n sylwi ar newidiadau yn eich siwgr gwaed neu os byddwch chi'n teimlo'n sâl.

Ewch yma i wefan GIG Cymru 111 i gael gwybod mwy am ddiabetes math 2 .