Bydd rhodd sganiwr elusen yn chwarae rhan bwysig mewn diagnosis canser

Mae sganiwr a fydd yn chwarae rhan hanfodol wrth ganfod canser ar ei ffordd i Ysbyty Castell-nedd Port Talbot – ac nid yw wedi costio ceiniog i'r GIG.

Bydd y peiriant uwchsain gwerth £80,000 yn cael ei ddefnyddio yn fuan yn y clinig lwmp pen a gwddf yng Nghanolfan Diagnosis Cyflym yr ysbyty.

Talwyd amdano gan godwyr arian ymroddedig gyda Her Canser Castell-nedd Port Talbot, sydd wedi rhoi £1 miliwn i wasanaethau canser lleol ers ei ffurfio ychydig dros 25 mlynedd yn ôl.

Llun: Gwahoddwyd aelodau Her Canser i Ysbyty Castell-nedd Port Talbot lle diolchodd staff iddynt am eu hymdrechion anhygoel dros y blynyddoedd.

Gall lympiau gwddf amheus gael sawl diagnosis posibl, gan gynnwys nifer o wahanol ganserau.

Gall meddygon teulu atgyfeirio cleifion 18 oed a dros, sy'n bodloni'r meini prawf, i'r clinig un stop yn y Ganolfan Diagnosis Cyflym.

Mae hyn yn cynnwys sgan uwchsain ac ymchwiliad pellach fel biopsi os oes angen, ac yna adolygiad gyda meddyg.

Dywedodd y radiolegydd pen a gwddf ymgynghorol Dr Shaheena Sadiq y byddai'r sganiwr uwchsain newydd yn disodli model hŷn ac yn chwarae rhan bwysig mewn diagnosis canser.

“Gall lympiau gwddf fod yn anodd i feddyg teulu eu hasesu gan ei bod yn heriol gweithio allan yn union o ble mae’r lwmp yn dod,” meddai.

“Unwaith y bydd claf wedi cael ei atgyfeirio gan y meddyg teulu am lwmp gwddf newydd sy’n peri pryder, uwchsain yw’r prawf cyntaf a wneir fel arfer.

“Yn ystod yr apwyntiad hwnnw gallwn ddefnyddio’r sganiwr i asesu’r lwmp a naill ai rhoi sicrwydd ar unwaith neu, gyda lympiau sy’n peri mwy o bryder, gallwn ddefnyddio’r peiriant i’n harwain i berfformio biopsi yn ddiogel.

“Mae uwchsain yn dda i oedolion a phlant gan nad oes unrhyw ymbelydredd. Mae hefyd yn ein helpu i ddewis y cleifion hynny y mae angen sganiau mwy cymhleth arnynt, neu'r rhai y mae angen eu hatgyfeirio at arbenigwr priodol yn yr ysbyty.

“Bydd y sganiwr newydd felly o fudd i gleifion ar draws y bwrdd iechyd a bydd yn chwarae rhan allweddol mewn diagnosis canser.”

Sefydlwyd Her Canser Castell-nedd Port Talbot ym 1997, gyda chôr, Cantorion Her Canser, wedi'i ffurfio ddwy flynedd yn ddiweddarach.

Dywedodd y Cadeirydd Peter Jones: “Nod yr elusen yw codi arian i ddarparu offer i ysbytai lleol i ganfod a thrin canser yn gynnar.

“Dros y blynyddoedd rydym wedi bod yn falch iawn o allu cynorthwyo i ariannu offer ar gyfer ysbytai Castell-nedd Port Talbot, Singleton a Threforys.

“Rydym yn ddiolchgar iawn i staff y GIG yn yr ardal am eu cyngor a’u cefnogaeth wrth ein harwain ynghylch pa offer sydd ei angen.

“Mae wedi bod yn gyffrous iawn i ni weithio gydag Ysbyty Castell-nedd Port Talbot dros yr ychydig flynyddoedd diwethaf ar gyfer y Ganolfan Diagnosis Cyflym. Mae'r gwaith sy'n cael ei wneud yma yn arloesol ac yn gyffrous.

“Rydym yn ddiolchgar iawn i staff y GIG am eu cyngor a’u cefnogaeth wrth ein harwain ynghylch pa offer sydd eu hangen. Rydym yn fwy na pharod i roi ein hymdrechion i godi arian ar eu cyfer.”

Os yw'r stori hon wedi eich ysbrydoli i godi arian ar gyfer eich GIG lleol, yna byddai Elusen Iechyd Bae Abertawe wrth eu bodd yn clywed gennych.

Elusen Iechyd Bae Abertawe (rhif elusen gofrestredig 1122805) yw elusen swyddogol Bwrdd Iechyd Prifysgol Bae Abertawe.

E-bostiwch y tîm elusen ar: swanseabay.healthcharity@wales.nhs.uk

Mae’n chwarae rhan hanfodol wrth godi arian ar gyfer prosiectau a gweithgareddau sy’n cefnogi cleifion, tra mae hefyd yn cefnogi amrywiaeth o brosiectau i wella’r amodau gwaith a’r cymorth sydd ar gael i staff.

Mae gan bron bob ward ac adran eu cronfa eu hunain, sydd i gyd yn dod o dan ymbarél Elusen Iechyd Bae Abertawe.

Felly os yw rhywun am roi rhywbeth yn ôl ar gyfer y gofal y maen nhw neu rywun annwyl wedi'i dderbyn, mae'r elusen yn sicrhau y bydd yr arian a godir yn mynd yn uniongyrchol yno.

Nid yw’r elusen yn disodli cyllid y GIG ond mae’n defnyddio cyfraniadau cenedlaethau a dderbyniwyd gan gleifion, eu teuluoedd, staff a chymunedau lleol i ddarparu y tu hwnt i’r hyn y gall y GIG ei ddarparu.

I gael gwybod mwy, dilynwch y ddolen hon i wefan Elusen Iechyd Bae Abertawe