Mae ein Polisi Ymweld yn llawer mwy na dim ond amlinellu ein hamseroedd ymweld. Mae'n edrych ar ymweld mewn ffordd gyfannol, gan gydnabod ei fod yn gyfle i gefnogi lles ac anghenion clinigol cleifion ar draws ein hysbytai.
Rydym yn gwybod bod ymweld â chleifion o fudd enfawr i lesiant cleifion, ac mae ymweliadau gan berthnasau, gofalwyr a ffrindiau yn rhan bwysig o adferiad claf. Nid yn unig mae hyn oherwydd bod ymweld yn caniatáu i gleifion ailgysylltu â'u hanwyliaid, ond mae llawer o gefnogaeth ymarferol y gall ymwelwyr ei chynnig. Gallant annog cleifion i wisgo, codi a symud o gwmpas a bod mor symudol â phosibl.
Mae hyn yn allweddol i osgoi 'datgyflyru' lle mae rhywun sy'n ansymudol mewn gwely ysbyty am gyfnod rhy hir yn colli cryfder corfforol, yn datblygu cymhlethdodau ac mewn rhai achosion, yn y pen draw yn colli ei annibyniaeth. Gall ymwelwyr hefyd helpu cleifion gyda'u hanghenion hydradu a maeth, trwy eu helpu a'u hannog i fwyta ac yfed. Mae hyn hefyd yn bwysig i sicrhau bod cleifion yn cadw mor iach â phosibl, ac mae'n cefnogi staff hefyd.
Wrth ystyried oriau ymweld, gall fod yn heriol cael y cydbwysedd cywir i bawb. Dylai mynediad fod mor agored â phosibl, tra ar yr un pryd yn sicrhau bod digon o amser i staff gynnal gofal clinigol, ac i gleifion orffwys.
Mae gan ein polisi amrywiaeth o opsiynau i chi gefnogi ymweliadau, os ydych chi'n aelod o staff, yn glaf neu'n ymwelydd. Mae gennym ni hefyd ystyriaethau arbennig ar gyfer plant, gofalwyr a chleifion a'r rhai sy'n derbyn gofal Dyddiau Olaf Bywyd.
Rydym yn croesawu gohebiaeth a galwadau ffôn yn y Gymraeg neu'r Saesneg. Atebir gohebiaeth Gymraeg yn y Gymraeg, ac ni fydd hyn yn arwain at oedi.