Sgyrsiau dros baned yn y sied yn helpu i hybu iechyd meddwl dynion

YN Y LLUN: William Beasley a Mathew Tidball gyda'r offer newydd a brynwyd ar gyfer Sied Dynion sydd newydd ei lansio ym mhrosiect Amaethyddiaeth â Chymorth Cymunedol Cae Felin.

Mae ardal bwrpasol i ddynion gloddio'n ddwfn mewn mwy nag un ffordd wedi'i datgelu mewn prosiect amaethyddol sydd wedi'i leoli ar dir Bwrdd Iechyd Prifysgol Bae Abertawe.

I nodi Diwrnod Iechyd Meddwl y Byd (Hydref 10fed), mae prosiect Amaethyddiaeth â Chymorth Cymunedol Cae Felin arobryn, sydd wedi'i leoli ger Ysbyty Treforys, wedi agor Sied Dynion yn swyddogol ar ei safle saith erw.

Mae CSA Cae Felin yn sefydliad di-elw gyda staff a'r cyhoedd yn rhoi o'u hamser i dyfu cnydau a phlannu coed ynghyd â chreu lle i natur a bywyd gwyllt ffynnu.

Nawr mae ganddo ardal unigryw i ddynion nid yn unig drafod cynnal a chadw'r safle ond iechyd meddwl hefyd.

Diolch i grant o £1,800 gan Gyngor Abertawe, mae Cae Felin wedi llwyddo i brynu offer a chyfarpar newydd ar gyfer sied wedi'i hailddefnyddio i gynorthwyo cynnal a chadw ar y safle a datblygu seilwaith.

Mae William Beasley yn llawfeddyg ymgynghorol ar y llwybr gastroberfeddol uchaf yn Ysbyty Treforys ac yn gyfarwyddwr yng Nghae Felin.

Dywedodd William: “Nid yn unig y mae’r arian wedi ein helpu i brynu offer a chyfarpar y gall y Sied Dynion eu defnyddio i gefnogi gweithgareddau yng Nghae Felin, mae hefyd wedi helpu i greu amgylchedd diogel a chyfforddus i gefnogi lles dynion.

“Drwy gydweithio’n agos â thîm Iechyd Galwedigaethol a Llesiant Staff y bwrdd iechyd, mae'r sied dynion ar gael i staff gwrywaidd y GIG, er y bydd ein drysau ar agor i bob dyn yn ein cymuned.

“Bydd gweithgareddau Sied Dynion yn cynnwys cynnal a chadw offer, adeiladu llochesi gompost a lluosogi, gosod offer dyfrhau, gwaith tirlunio, yn ogystal â thasgau garddwriaethol i gadw ein cynhyrchiad ffrwythau a llysiau i fynd.

“Ochr yn ochr â hynny, byddwn yn sicrhau bod digon o amser i ddynion siarad dros baned a bisgedi. Byddwn yn cael ein cefnogi ymhellach gan Gymdeithas Sied Dynion y DU fel rhan o rwydwaith Sied Dynion ehangach.”

Wedi'i sefydlu i ddarparu ymateb i'r argyfwng parhaus, cynyddol a thawel yn bennaf ym maes iechyd a lles dynion, mae Grŵp Iechyd Dynion y bwrdd iechyd wedi ymweld â Chae Felin yn rheolaidd i roi cyfle i staff gwrywaidd hybu eu lles.

Nawr mae'r grŵp wedi cryfhau ei gysylltiadau â Chae Felin a bydd yn defnyddio'r Sied Dynion yn ystod ei ymweliadau.

Dywedodd Mathew Tidball, Arweinydd Proffesiynau Iechyd Cynghreiriol ar gyfer Iechyd Galwedigaethol a Llesiant Staff: "Mae Grŵp Iechyd Dynion y bwrdd iechyd wedi elwa'n fawr o'n hymweliadau â Chae Felin, lle mae aelodau wedi cael y cyfle i fynd allan i'r awyr agored, cysylltu ag eraill a chymryd rhan mewn gweithgareddau ystyrlon fel cynaeafu, plannu a thirlunio.

“Mae treulio amser mewn amgylchedd hamddenol yn yr awyr agored wedi annog sgwrs, cysylltiad cymdeithasol a theimlad o gyflawniad, a gall pob un o’r rhain gael effaith gadarnhaol ar lesiant.

“Gan adeiladu ar y llwyddiant hwn, datblygu'r Sied Dynion yw’r cam nesaf perffaith, gan ddarparu cyfleoedd parhaus i ddynion ddod at ei gilydd, rhannu sgiliau, cefnogi ei gilydd a chynnal y cysylltiadau pwysig hynny.”

Dywedodd Paul Dunning, Pennaeth Proffesiynol Iechyd a Llesiant Staff: "Bydd Sied Dynion newydd yn chwarae rhan sylweddol wrth helpu i gefnogi iechyd a llesiant ein staff, yn enwedig y rhai sy'n gweithio mewn amgylcheddau heriol a dan bwysau uchel.

“Mae tystiolaeth yn awgrymu bod pob Sied Dynion yn arbennig o effeithiol wrth ymgysylltu â dynion a allai fod yn amharod i gael mynediad at wasanaethau cymorth traddodiadol, gan helpu i herio'r stigma sy'n dal i fodoli o amgylch iechyd meddwl dynion a chreu cyfleoedd ar gyfer cefnogaeth gan gyfoedion a gwella lles seicolegol.”

Anfonwch e-bost at caefelincsa@outlook.com am ragor o wybodaeth.