Cyhoeddwyd Digwyddiad Parhad Busnes yn Ysbyty Treforys oherwydd pwysau aruthrol

Cyhoeddwyd Digwyddiad Parhad Busnes yn Ysbyty Treforys heddiw oherwydd pwysau aruthrol ymhlith ein gwasanaethau brys a'n gwasanaethau gofal heb ei gynllunio.

Dim ond o dan amgylchiadau eithriadol y caiff Digwyddiadau Parhad Busnes eu sbarduno, ac arweiniodd nifer eithriadol o uchel o gleifion brys difrifol wael yn aros am welyau at gyhoeddi'r Digwyddiad Parhad Busnes - mwy na 80 ar hyn o bryd.

Dywedodd Dr Mark Ramsey, Cyfarwyddwr Meddygol Ysbyty Treforys, fod popeth yn cael ei wneud i ryddhau cleifion nad oes angen gofal meddygol acíwt arnynt mwyach fel y gallai'r cleifion sâl iawn gael gwelyau.

Rydym yn disgwyl i'r ysbyty fod yn eithriadol o brysur dros y dyddiau nesaf oherwydd y gostyngiad mewn tymheredd o ganlyniad i'r tymor a all achosi mwy o salwch.

Oherwydd y pwysau aruthrol ar ofal brys a gofal heb ei gynllunio, gofynnir i'r cyhoedd beidio â dod i'r Adran Achosion Brys oni bai eu bod yn sâl iawn neu wedi'u hanafu'n ddifrifol.

Dewch i'r adran dim ond os ydych yn profi'r canlynol:

• Anawsterau anadlu difrifol
• Poen neu waedu difrifol
• Poen yn y frest neu strôc bosibl
• Anafiadau trawma difrifol

Os oes gennych chi salwch neu anaf llai difrifol, ystyriwch y ffyrdd eraill o gael y gofal sydd ei angen arnoch.

Ar gyfer mân anafiadau, ewch i'r Uned Mân Anafiadau yn Ysbyty Castell-nedd Port Talbot. Ewch yma am fwy o wybodaeth am yr Uned Mân Anafiadau a'r amrywiaeth o anafiadau y gellir eu trin yno. Noder NA ALL yr Uned Mân Anafiadau drin anafiadau neu salwch difrifol.

Gallwch chi hefyd fynd yma i droi at wiriwr symptomau ar-lein 111 GIG Cymru am gyngor. Hefyd gallwch ffonio 111 GIG Cymru am gyngor, ond gall y llinellau ffôn fod yn brysur, felly os yw hi'n bosibl ewch i'r wefan uchod fel man cychwyn cyn ffonio.

Gall eich fferyllfa leol gynnig triniaethau dros y cownter AM DDIM ar gyfer ystod eang o salwch cyffredin, unwaith i chi gofrestru. Gall y fferyllfa gynnig nifer gyfyngedig o feddyginiaethau presgripsiwn heb fod angen i chi fynd at eich meddyg teulu. Ewch yma i gael rhagor o wybodaeth am sut gall eich fferyllydd helpu.

Os oes angen cymorth iechyd meddwl arnoch, gallwch ffonio 111 a dewis Opsiwn 2 i siarad â thîm o ymarferwyr iechyd meddwl.

Dywedodd Dr Ramsey: "Gall teuluoedd ac anwyliaid chwarae rôl allweddol wrth ein cefnogi ni os gallan nhw fynd â'u perthnasau gartref cyn gynted â phosibl, neu os gallan nhw helpu gyda'r cymorth ychwanegol sydd ei angen nes bod pecyn gofal yn ei le.

"Mae hefyd er lles gorau cleifion i adael yr ysbyty ar amser, oherwydd gallan nhw gael eu niweidio gan arhosiad hir yn yr ysbyty a achosir gan anweithgarwch a’r risg o ddod i gysylltiad â heintiau. Mae mynd gartref cyn gynted â phosibl yn well i'w hadfer a'u lles cyffredinol, ac mae'r rhan fwyaf o bobl eisiau bod gartref." 

Mae tua 300 o gleifion yn ysbytai Bae Abertawe sydd wedi cwblhau eu triniaeth feddygol ond sy’n dal yn eu gwelyau, oherwydd bos llawer ohonynt yn aros am gymorth ychwanegol neu becyn gofal i gael ei roi yn ei le cyn iddynt adael.

Mae'r Bwrdd Iechyd yn parhau i gydweithio ag awdurdodau lleol i gefnogi rhyddhau cleifion.