Cydnabyddiaeth i nyrs Bae Abertawe yng ngwobrau Nursing Times

Mae nyrs bediatreg Bae Abertawe wedi’i henwi’n rownd derfynol gwobr fawreddog am ei gwaith yn codi ymwybyddiaeth o’r heriau sy’n wynebu plant â thiwbiau bwydo.

Mae Louise Heywood, nyrs maeth pediatreg yn Ysbyty Treforys yn gweithio gydag 85 o deuluoedd a'u plant sydd â thiwbiau trwynol (NG).

Mae'r tiwbiau arbennig hyn yn cadw plant, nad ydyn nhw'n gallu bwyta'n arferol, yn fyw.

Maent yn danfon bwyd, hylif a meddyginiaeth i'r stwmog trwy diwb yn y trwyn.

Mae Louise wedi cael ei henwebu yng nghategori Gwella Urddas Cleifion Gwobrau'r Nursing Times eleni am gynhyrchu fideo o'r enw 'This is Me', gyda'r nod o godi ymwybyddiaeth i newid agweddau negyddol y mae teuluoedd yn dod ar eu traws.

Mae rhai wedi clywed sylwadau niweidiol wedi'u hanelu at eu plant sy'n dibynnu ar y tiwbiau hyn i oroesi.

Creodd Louise grŵp cymorth ac mae'n trefnu boreau coffi rheolaidd ar gyfer y teuluoedd y mae'n gweithio gyda nhw, a phenderfynodd fynd i'r afael â'r mater ar ôl clywed am yr anawsterau roeddent yn eu hwynebu.

Mae'r fideo yn dangos y plant yn chwarae, paentio, nofio, sgïo ac yn gyffredinol yn cael hwyl i ddangos nad ydyn nhw'n wahanol i eraill.

Meddai Louise: “ Roeddwn wedi fy syfrdanu ac yn falch iawn o gael fy enwebu ond mae hyn ar gyfer y teuluoedd nid i mi.

“Os gall hyn eu helpu a gwneud pobl yn fwy ymwybodol o beth yw’r tiwbiau bwydo a’r heriau y mae teuluoedd yn eu hwynebu, yna dyna dwi eisiau.

“Dim ond trwy sgwrsio gyda’r teuluoedd y deuthum yn ymwybodol o’r pethau creulon a ddywedwyd wrthynt dim ond oherwydd bod eu plant yn cael eu bwydo trwy diwb.

“Roeddwn i eisiau gwneud rhywbeth i'w helpu.

“Er bod gan y plant diwbiau bwydo maen nhw'n byw bywydau normal egnïol.

“Dydyn nhw ddim yn dewis eu defnyddio, mae’n rhaid iddyn nhw.

“Gofynnwyd i rai teuluoedd adael caffis oherwydd bod eu plant yn cael eu bwydo â thiwb.

“Efallai nad yw rhai pobl wedi gweld y tiwbiau hyn o’r blaen ac nad ydyn nhw’n ymwybodol o’u hangen.”

Mae gwaith Louise eisoes wedi ennill clod Gwobr Maeth Clinigol Cenedlaethol fel Proffesiynol y Flwyddyn.

(Yn y llun ar y dde: poster ymwybyddiaeth ar gyfer plant â thiwbiau bwydo)

Nawr mae hi wedi cynhyrchu poster codi ymwybyddiaeth i'w arddangos mewn ysbytai a meddygfeydd.

Ychwanegodd: “Cawsom luniau gyda’n plant ar y ward gyda chymeriadau Disney yn eu bwydo.

“Roeddwn i eisiau dangos eu bod yn blant anhygoel sy’n byw bywydau egnïol arferol ac yn sicr roedd cael y cymeriadau yno wedi helpu’r plant i deimlo’n dda.”

Mae gwaith Louise hefyd wedi ennill cydnabyddiaeth ryngwladol ar ôl ei chyflwyniad rhithiol diweddar i gynhadledd bediatreg Ewropeaidd a gynhaliwyd yn Estonia.

Bydd hi nawr yn gwneud cyflwyniad i feirniaid Gwobrau'r Nursing Times yn Llundain ym mis Medi cyn i'r enillwyr gael eu cyhoeddi ddiwedd mis Hydref.