Codi arian i elusennau a gofalu am gydweithwyr yn helpu Ailish i ennill gwobr Cymru gyfan

Ysbrydolodd profiad perthynas o radiotherapi Ailish McGrail i ddilyn gyrfa sydd wedi arwain at ennill gwobr Cymru gyfan iddi.

Mae Ailish, radiograffydd therapiwtig yn Ysbyty Singleton, wedi cael ei henwi'n Weithiwr Proffesiynol Radiograffeg y Flwyddyn yng Nghymru.

Nid cydnabyddiaeth o'i gwaith yng Nghanolfan Canser De-orllewin Cymru yn unig ydoedd, ond hefyd gweithgareddau allgyrsiol i godi arian ar gyfer cronfa elusennol y ganolfan a gofalu am lesiant ei chydweithwyr.

Roedd Ailish, sy'n trefnu digwyddiad codi arian mawr i gefnogi'r ganolfan ganser yn ei thref enedigol, Maesteg, y mis nesaf, mor benderfynol o ddod yn radiograffydd fel na fyddai'n gadael i rwystr cynnar ei hatal.

“Cafodd perthynas i mi radiotherapi pan oeddwn i’n 14 oed,” meddai. “Dyna pryd y dysgais am radiotherapi oherwydd doeddwn i ddim yn gwybod amdano. A phenderfynais mai dyna oedd rhywbeth roeddwn i eisiau ei wneud.

“Wnes i ddim cael mynd i’r brifysgol y flwyddyn gyntaf oherwydd nad oedd gen i’r cymwysterau cywir. Felly, cysylltais â’r brifysgol i ofyn beth oedd rhaid i mi ei wneud.

“Yna fe wnes i dystysgrif addysg uwch mewn gwyddorau iechyd drwy’r Brifysgol Agored ac fe wnaeth hynny fy arwain at y cwrs yn ôl yn 2018. Roeddwn i’n gwybod fy mod i eisiau gweithio yma yn Singleton oherwydd dyma le gwnes i fy hyfforddiant.”

Roedd y wobr yn seiliedig ar lesiant ac elusen Ailish. Tua dwy flynedd yn ôl dechreuodd godi arian ar gyfer cronfa elusennol y ganolfan ganser, sy'n dod o dan ymbarél Elusen Iechyd Bae Abertawe.

“Dechreuais yn fach, gan gynnal rafflau a gwerthu cacennau yn y gwaith,” meddai. “Cododd hynny £4,500 mewn blwyddyn a hanner ac rwyf ar hyn o bryd yng nghanol trefnu digwyddiad codi arian enfawr yng Nghlwb Rygbi Maesteg.”

Mae hynny'n digwydd ddydd Sadwrn, Awst 15^fed , gyda diwrnod hwyl i'r teulu gydag amrywiaeth o atyniadau o 1yp-5yp, ac yna noson o gerddoriaeth a raffl gwobrau rhwng 5yp a hanner nos.

Bydd yr elw yn mynd i apêl Mynd yr Ychwaneg Filltir ar gyfer Canser Elusen Iechyd Bae Abertawe, sy'n anelu at godi £200,000 ar gyfer y ganolfan.

A phan nad yw hi'n trefnu digwyddiadau codi arian i elusennau, mae Ailish yn brysur yn gofalu am ei chydweithwyr fel hyrwyddwr lles y tîm.

“Rydw i wastad wedi bod â diddordeb mewn iechyd meddwl, lles, pethau fel hynny, felly fe wnes i fodiwl meistr mewn seicoleg gofal canser,” meddai.

“Rwy’n gwneud llawer o bethau er lles yr Adran. Rydym yn trefnu diwrnodau lles fel bod y staff yn dod at ei gilydd y tu allan i’r gwaith. Rydym yn cael cyllid gan Macmillan ar gyfer hynny.

“Rwy'n gwneud cylchlythyr bob mis, gyda phethau cyffrous yn dod i fyny i bawb yn eu bywydau personol. Mae'n rhywbeth i gael pawb i siarad.

“Rwy’n gwybod pa mor bwysig yw iechyd meddwl, dyna pam rwy’n ceisio mor galed i hyrwyddo hynny yn y gwaith. Mae’n rôl mor ddwys ac yn amlwg rydym yn gweithio gyda chanser a all fod yn eithaf blinedig yn feddyliol.”

Cafodd Ailish ei henwebu am y wobr gan y prif radiograffydd Nadia Saunders, ond yn gyfrinachol. Y tro cyntaf iddi wybod amdani oedd pan gysylltwyd â hi i'w gwahodd i'r noson gyflwyno ar ôl iddi gael ei rhoi ar y rhestr fer.

Roedd ymrwymiadau gwaith yn golygu na allai hi fynychu, ond yna derbyniodd e-bost yn ei hysbysu ei bod wedi ennill.

Er na allai ddod i'r seremoni wobrwyo, cyflwynwyd ei gwobr i Ailish yn bersonol pan ymwelodd Katie Thompson, Llywydd Cymdeithas y Radiograffwyr, â Chanolfan Canser De-orllewin Cymru.

“Roedd yn wych,” meddai Ailish. “Roeddwn i’n eithaf cyffrous amdano os ydw i’n onest. Dydw i ddim yn gwneud y gweithgareddau lles a’r codi arian i gael sylw. Dw i jyst yn gwybod pa mor bwysig ydyn nhw, a dw i wrth fy modd yn eu trefnu.

“Rwy’n caru’r swydd. Yn ei charu’n llwyr. Fel y dywedais i, roeddwn i’n gwybod bod hyn yn rhywbeth roeddwn i eisiau ei wneud o oedran ifanc. Roeddwn i’n gwybod pa mor wych oedd y teimlad, gan wybod bod y driniaeth a gafodd fy mherthynas wedi’i wella.

“Roeddwn i eisiau gwneud i bobl eraill deimlo fel roeddwn i a fy nheulu’n teimlo. Dim ond 15 munud y dydd am gwpl o wythnosau rydyn ni’n eu gweld y cleifion hyn, felly mae bod yn wyneb caredig yna’n mynd yn bell gyda llawer ohonyn nhw.

“Mae gwybod fy mod i’n gwneud y gorau y gallaf i helpu’r bobl hyn yn gwneud i mi deimlo fy mod i’n cyflawni rhywbeth ac yn gwneud rhywbeth da.”

Dilynwch y ddolen hon am docynnau i'r digwyddiad gyda'r nos.

Dilynwch y ddolen hon am restr lawn o wobrau a manylion sut i brynu tocynnau raffl.

(Nodyn: Safleoedd allanol yn Saesneg yn unig)