Cadwch yn ddiogel a gofalwch am eich gilydd yn y tywydd poeth

Gofynnir i bobl ledled Bae Abertawe ofalu am ei gilydd a chymryd rhagofalon synhwyrol gyda'r rhybuddion tywydd poeth sydd ar waith ar hyn o bryd.

Disgwylir i dymheredd yng Nghymru gyrraedd uchafbwyntiau digynsail dros y dyddiau nesaf.

Gallai hyn effeithio ar unrhyw un, waeth beth fo'u hoedran neu eu hiechyd, ond pobl hŷn, babanod a phlant ifanc iawn sydd mewn mwyaf o berygl gan y gallant ddirywio'n gyflym mewn tymereddau uchel.

Gwiriwch eraill, yn enwedig pobl hŷn, plant ifanc, a'r rhai sy'n agored i niwed am resymau eraill.

Arhoswch yn y cysgod lle bo modd ac yfwch ddigon o ddŵr drwy gydol y dydd. Cadwch fannau dan do yn oer – caewch lenni, bleindiau a ffenestri yn ystod y dydd, yna agorwch gyda'r nos.

Os ydych chi'n mynd allan i'r awyr agored, defnyddiwch eli haul SPF 30 neu uwch gydag o leiaf 4 seren o amddiffyniad UVA.

Mae camau syml eraill y gallwch eu cymryd i leihau'r risg o fynd yn sâl wedi'u nodi isod.

Cadwch allan o'r haul ac osgowch unrhyw ymarfer corff rhwng 11yb-3yh pan fydd yr haul ar ei gryfaf a chau llenni mewn ystafelloedd sy'n wynebu'r haul. Os ydych chi'n mynd allan, ewch â dŵr gyda chi, arhoswch yn y cysgod, gwisgwch eli haul a het lydan.

Rhowch y cyfle gorau i chi'ch hun i osgoi oedi drwy wirio cyflwr y ffyrdd os ydych chi'n gyrru, neu amserlenni bysiau a threnau, gan ddiwygio'ch cynlluniau teithio os oes angen.

Os ydych chi'n defnyddio trafnidiaeth gyhoeddus, mae yna lawer o bethau syml y gallwch chi eu gwneud i gadw'ch hun yn ddiogel; cariwch ddŵr gyda chi, ewch â ffan fach llaw sy'n cael ei phweru gan fatri, os ydych chi'n teimlo'n sâl ewch oddi ar y cerbyd yn yr arhosfan nesaf am ychydig o awyr iach, gwisgwch ffabrigau ysgafn mewn lliwiau golau i helpu i aros yn oerach, cadwch lygad ar gyd-deithwyr am arwyddion y gallent fod yn cael trafferth.

Helpwch i amddiffyn pobl agored i niwed rydych chi'n eu hadnabod gan gynnwys pobl hŷn, y rhai â chyflyrau sylfaenol a'r rhai sy'n byw ar eu pennau eu hunain; efallai y bydd angen cymorth arnyn nhw i gadw'n oer ac i aros yn hydradol. Os ydych chi'n poeni am eich iechyd, neu iechyd rhywun rydych chi'n ei adnabod, cysylltwch â 111.

Cadwch eich hun yn ddiogel wrth fwynhau'r dŵr yn y tywydd hwn drwy ddilyn y camau syml hyn: ewch i mewn i'r dŵr yn raddol, gan osgoi neidio neu blymio'n syth i mewn, er mwyn lleihau'r risg o gael eich dal yn y dŵr oer, ewch i draeth sydd â gwylwyr bywyd neu ardal nofio dan oruchwyliaeth, ac, os byddwch chi, neu unrhyw un arall, yn cael trafferth yn y dŵr, arnofiwch ar eich cefn.

Mae pobl yn ymdopi'n well â thoriadau pŵer pan fyddant wedi paratoi ar eu cyfer ymlaen llaw. Mae'n hawdd ei wneud; ystyriwch gasglu fflach lampau a batris, pecyn pŵer ffôn symudol ac eitemau hanfodol eraill.

Dilynwch y ddolen hon i ganllaw Iechyd Cyhoeddus Cymru ar dywydd poeth.

Dilynwch y ddolen hon i wefan y Swyddfa Dywydd am y diweddaraf am y tywydd. Nodyn: mae'r wefan hon ar gael yn Saesneg yn unig.